DAN LEH KHAWNGAIHNA (Galatia 2:16-21, 3:10-14)

- Rev. C.Chanchinmawia   

Dan hi Mosia hmanga pek a ni a, khawngaihna erawh chu kan Lalpa Isua Krista avanga lo awm a ni(John 1:17). Mosia hnena Dan pekte hi thuah thumin a sawi theih ang- rilru lam Dan (Moral Law) Ex.20:1-7;Vantlang Dan (Judicial Law) Ex.21:1-24;Serh leh sang Dan (Ceremonial Law) Ex.25:1-40.
Dan lo awm chhan: 1) Bawhchhiatna hi sual a nih ti langfiah tura thutiam belhchhahna a ni. 2) Rinna avang thiam kan chan theihna turin Dan chu Krista hnen lama min kaihruaitu a ni. 3)Krista lo lan hmaa min kaihruaitu atan a lo awm a ni. 4) Dan avangin sual hriatna a lo awm a ni si a. 4) Dan chu Thlarau lam thil atana pek a ni.
    Hetiang hian Dan leh khawngaihna chu i han khaikhin teh ang : 1) Dan chuan thiam loh a chantir a. Khawngaihna chuan thiam a chantir a. 2) Dan chuan sual a hriattir a. Khawngaihna chuan a ngaidam a. 3) Dan chuan a phut a. Khawngaihna chuan a thawhsak a. 4) Dan chuan, “Misual chu a thi ang,” a ti a. Khawngaihna chuan a ti nung a. 5) Dan chuan a dil a. Khawngaihna chuan a pe a.
    Dan hnuaia awmte leh khawngaihna hnuaia awmte danglamna : 1) Dan hnuaiah chuan Beram chu a pu tan a thi a. Khawngaihna hnuaiah chuan Berampu chu Beram tan a thi a. 2) Dan hnuaiah chuan mahni thil tih thatin min muan a. Khawngaihna hnuaiah chuan khawngaihtu thil tihin min muan a. 3) Dan hnuaiah chuan mahni langsar tura beihna a lian a. Khawngaihna hnuaiah chuan mahni insitnain hmun a luah a. 4) Dan hnuaiah chuan mahni thiltihin min tilawm a. Khawngaihna hnuaiah chuan Pathian thiltihah an lawm a. 5) Dan hnuaiah chuan mahni inhlanna an ring a. Khawngaihna hnuaiah chuan khawngaihtu inhlanna an ring. 6) Dan hnuaiah chuan Pathian tana inthawinain hmun a luah a.Khawngaihna hnuaiah chuan Krista inthawinain hmun a luah thung a. 7) Dan hnuaiah chuan mahni indah pawimawhnain hmun a luah a. Khawngaihna hnuaiah chuan Krista pawimawhnain hmun a luah. 8) Dan hnuaiah chuan phunchiarna leh lungawi lohna a lian a. Khawngaihna hnuaiah chuan lungawina leh tlawmnain hmun a chang. 9) Dan hnuaiah chuan midang sualna a langsar a. Khawngaihna hnuaiah chuan mahni sualna a langsar thung. 10) Dan hnuaiah chuan chaponain thinlung a luah a. Khawngaihna hnuaiah chuan inngaihtlawmnain thinlung a luah thung. 11) Dan rorela awm chu thihna a nih laiin, Khawngaihna rorelna chu nunna a ni. 12) Dan hnuaiah chuan thiam loh chantirna a ni a. Khawngaihna hnuaiah chuan thiam chantirna rorelna a ni.
    Dan hnuaia rawngbawltu Mosia’n thilmak a tih hmasak ber chu Tui thisena chantir kha a ni a. Chu chu thihna entirna an ti thin. Khawngaihnaa rawngbawltu Isua thilmak tih hmasak ber chu Tui Uain-a chantir a ni thung a. Chu chu nunna entirna an ti thin. Aigupta hremna hnuhnung ber, Mosia hmanga tih chu Fatir thihna a ni. Chu chuan Dan tawpna a entir an ti thin. Krista thilmak tih hnuhnun ber chu Lazara kaihthawh a ni a. Chu chuan nunna pek a entir a. Dan puan chhuah ni chuan mi 3000 tihhlum zuk awm a (Ex. 32:26-38). Khawngaihnaa hnathawh puanchhuah ni-ah chuan mi 3000 chhandamin zu awm ve thung a (Tirh 2:41).
    Dan chu Darthlalang (looking glass) ang hi a ni a. Darthlalang chu inenna a ni. Mahni inhmuh chianna a ni. Darthlalang chuan kan hmel bal min hmuh fiahtir a, a tifai thei lo thung a. A silfaina tui lam min kawhhmuhtu a nih chu. Dan chu hriattirtu rinawm a ni a, khawngaihna chu a tifamkimtu a ni.Mahni lawmna mai zawnga rawngbawltute hi Dan hnuaia rawngbawltu an ni fo. Midangte tana rawngbawltute hi Khawngaihna hnuaia rawngbawltu an ni thin. Dan hnuaia nung tan chuan thilpek thawhlawm te, Inkhawm te, tawngtai te, Kohhran dan tinrengte hi a hnawk fo va, phurritah a chang thin. Khawngaihna rorela awmte tan erawh chuan phurrit a ni lo va, khapsakin awm se an tan phurrit a ni zawk dawn a ni.
Felna thing Lalpa phun, a chhe lai siamthatu ni turin Khawngaihna chuan kan chungah ro a rel tawh si a. Mi dem hman a ni ta lo, Ni a lo kiam sawt em!!
Lapa’n malsawm rawh se.