KRISTA AVANGA MI A - Rev. Vanlalzuata

Tirhkoh Paula te’n “Krista vanga mi â kan ni” an tih hi eng nge a zawmzia ni ang? Krista vanga tuar ngam, Krista vanga khawvel thil kalsan ngam an nihna an sawifiah a ni. Amah ngeiin, “Kan Lalpa Isua hriatna ropui bik avangin engkim hi channaah ka ruat a... hnawmhne ah ka ngai a ni,” a ti a (Phil. 3:8). Thu maiin Isua chu an hre mai lo va, amah avangin nun danglam an nei a, Isua thu an awih chu an nunin an awihzia an tilang thin a ni. Krista avangin mite tihdan an zui lo va, “Tunlai dan alawm” tiin a awlsam an zawng ve lo.
    Krista avanga Petera te atzia te kha khawvel mite chuan an nuihzat hle in a rinawm. Zankhua in len an deng a, an hlawhchham let der a. Chumi hnuah chuan mak tak nmaiin an hlawhtling ta phut mai a, sangha tam tak an man ta a. Amaherawhchu an sangha mante chu an lente nen an kalsan a, Lal Isua an zui san ta daih mai a (Lk. 5:1-11). An sangha man zozaite kha bazarah han zuar sela, a man a tam dawn nen, an kalsa ta daih mai si a. An va â tak em!! Khawvel mite ngaih chuan hmuhsitawm tak an ni ang.
    Vawikhat chu hmeichhe pakhatin hriak rimpui manto ta, duli 300 man chu Isua hmaah a leihbaw vek mai a. Chung hun lai chuan duli hi patling nikhat hlawh tawk a ni a, chuti anih chuan ni 300 hlawh a nih chu. Mite chuan he hneichhia hi â an ti em em mai a, Isua ke bula hriak manto lutuk a sawhkeh ta mai chu an ui a. nimahsela Isua’n a lo ngaihlu hle a, “He hmeichhe thiltih hi Chanchin Tha an hrilna apiangah an sawi ve zel ang,” a ti hial a (Matt. 26:6-13) Krista avanga mi â te hi chu khawvel mite’n an hmusit thin a ni. Nimahsela Isuan a ngaihlu si.
    Vawikhat chu mi pakhat hian a neih zawng zawng a hralh a, lo pakhat a lei tawp mai bawk a(Matt. 13:44). Mite chuan â an ti teh ang chu. Lo neitupa pawh chuan, ‘Ka bum’ a ti ngeiin a rinawm. Amaherawhchu chupa chuan a hma in a lo lei turah chuan ro phumruk a lo hmu ru reng hi a lo ni a. Chu ro chu a neih zawng zawng aia hlu daih zawk a ni si a, Krista avanga mi â te hian nuihzat hlawh thin mahse ro phumruk an lo hmu ru reng thin a lo ni.
Nova’n kum za lai lawng a tuk lai khan mite chuan an nuihzat ngawt ang. Khawvel thila rual el ve hman lek lovin khawkheng hnuaiah pawh lawng a tu tlut tlut mai a. Amaherawhchu Nova hian, “Lawng tu rawh” titu aw chu ringhlel hauh lovin a tu a, ama thu in a tu ringawt lo. Tui a lo let meuh chuan Pathian avanga mi â chu a che fuh leh ta. A tawpah phei chuan mite hmuhsit bera phei chu khawvel thar dintu a lo ni ta a ni.
    He khawvelah hian finna leh thiamna a sang zel a, chumi rualin Krista avanga mi â nih hi a harsa tial tial dawn niin a lang. Rualawhna leh mahni hmasialna an inkawmngeih tial tial a. Kan nei tam tial tial a, kan duhamna a zual tial tial bawk a, taihmak hi a tha a, Kristian nih nen a inhmeh a; amaherawhchu taimakna hi duhamna nen a inthian tawh chinah chuan sualna khurpui lam panin min hruai thin a ni. Chutiang mite chu Pathian lamah an fing ram a, Pathian avanga tuar te, hmuhsit te, chan te an hreh a, khawvel thilah an â but thung a, an hlawkna turah chuan dik leh dik lo pawh dawn lovin an ri bawrh bawrh thung a.
    Krista avanga mi â te chuan Pathian thu a nih phawt chuan ‘Ta se, ta lo se’ tih chhut si se lovin, an thu hriat chu a takin an pawm hmiah mai a, an nunpui nghal a. Chu chu ‘Thlarau mi’ kan tih awmzia hi a lo ni ber zawk.   Pathian thu hi zir a pawimawh a, amaherawhchu, a taka nunpui ngam ve lo tan chuan beidawnna a ni thung. Hre tam ai chuan zawm tam te hian an tifuh zawk a, hriat tam tumin zir ila, zawm tam tum bawk ila a tha ber ang. Krista avanga mi a te chuan an hriat chhun hi mawl takin an ring bur mai a, an hriat belh apiang an zawm bawk thin.
    Kan rama ringtu nuna harsatna hi Pathian thu kan hriat loh vang a ni lo va, kan hriat anga kan nunpui loh vang a ni zawk ang. Rangbawltute zingah ngei pawh hian hre tam si, zawm tlem si kan tam hian kan rawngbawl hna hian a tuar thin. Pathian thu hi chu kan duh khawp mai, nimahsela a taka nunpuitute hi chu kan nuihzat deuh tlat si. Krista avanga mahni hamthatna tur pawh chan ngam tute hi mite’n an hmusit thin a. An sirah kut tling lova sum lakluh vanga mi neinung takte chuan zah an hlawh zawk fo \hin a. Chu chu khawvel dan a ni a, kan Lalpa dan erawh chu a ni lo. Chu chu sawiin, Dr.H.Bonar-a chuan,
    “Kal la thawk rawh a la tawk lo,
    Hlohna hi van hlepna a ni;
    Mihringin an fak lo che a,
    Lalpan a fak loh che ring suh”
tiin hla a lo phuahchhuak a, Krista avanga mi â te chuan Lalpa lo chu fak tur an hrelo ang bawkin, mite fak hlawh aiin Lalpa fak hlawh an duh ber. Mite fak derna lakah an tawlhthlu ngai lo va, mite sawizelna lakah an hnual chuang hek lo. An â em em a, an fing bawk si a ni.
    Mi \henkhatte chu Kohhranah pawh hian an phunchiar em em a. Hruaitute tlin lohna laiah an tui a, kohhran kalhmang an sawisel reng a, an inthlahdah phah hial \hin a. Krista vanga mi â te erawh chu midangte tlin lohna laiah tui lovin Pathian thuah an tui mai a, neuh neuhin a tibuai ve lo va, Kraws kawng an zawh tawp a, an ât a leiah fin an hlawh zawk thin. Mi nunah an tlu ve lo va, mi an tluk pawhin an alh phah zawk thin. Liandova te unau ang khan lungawi takin hmuhsitna chu an tuar a, chumi hmunah vek chuan Pathianin malsawmna in a vur thin.
(He sermon hi www.youthinternetministry.com a\anga lakchhawn a ni.)

Chanmari West Branch K|P Variety show - 2011 hlawhtling taka hman a ni

Hun rei tak a\anga lo ruahman tawh Branch sumtuakna atana Variety show chu ni 22.7.2011 (Zirtawp) zan khan hlawhtling taka hman zawh a ni ta a. Item nei tura beisei zawng zawngten an tihlawhtling thei a ni.
    Media Committee chuan kum tir a\angin kumin chhungin Variety Show neih ni se tiin a rel a. Chu rawtna chu Branch Committee-ah thlenin Branch Committee chuan a hun atan June ni 22, Zirtawpni zan a ruahman ta a ni.
    Hun hmang turin Nl. C. Lalbiakzuali leh LJ’s Band te beisei an ni a. Anni bakah hian kan Branch chhunga Group hrang hrang parukte chu item nei turin a ruat bawk a. Zai tur leh item nei tura ruat zawng zawngte hian \ha takin an tihlawhtling thei vek a ni.
    Variety Show hi Tv. H. Lalchhuanmawia, Branch secretary chuan \awng\aiin a hawng a. Obadia group chuan aw chhuah miah lovin, mawi tak siin Haleluia Chorus an sa a, item bul \anna \ha tak a ni. Mika group ten Lal Isua lo kal leh huna hlim taka kan thawh leh tur thu hmuhnawm takin an entir zawh hnuin |halai Entu Editorial Board leh anmahni puituten hun hlimawm tak an hmang a. An zawha hun hmang Joela Group ten stage-a tui an han hleuh thei te chu hmuhnawm danglam tak a ni. Nahuma Group ten Lal Isua chuan kan phurrit zawng zawng min chhawk vek thei a ni tih remhre taka an entir hnuah Amosa Group ten hlimna tak tak chu Lal Isua neih chauh hi a ni tih an entir ve leh a. Les Duapers ten Samari Mi \ha lemchan tunlai takin an chang a,  Jona Group ten item changkang leh hmuhnawm tak mai entirin Group hrang hrangten item nei tura beisei an nih angin an tihlawhtling thei vek a ni. Hemi hnu hian Nl. C. Lalbiakzuali leh LJ’s Band ten zaiin Pathian an chawimawi bawk. Pu Rodingliana Tochhawng, Bial K|P Asst. Leader chuan \awng\aiin hun a khar a ni.
    He hunah hian mipui an kal \ha thawkhat a. Group hrang hrangte inbuatsaihna a \hain an hun hmante chu zahpuiawm lo tak tak a ni hlawm. Sum tuakna a nih angin he hun atan hian ticket siam a ni a. Rawngbawlnaa ngaia lo leitu zawng zawng chungah Chanmari West Branch K|P chu a lawm takzet a ni.

PATHIAN HNENA LAWMTHU SAWI Nl. K.Lalthanpuii, Jona Group

   “Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u. (Kol 3:17)”
 Pathian hnenah hian lawmthu kan sawi fo \hinin ka ring a, amaherawhchu, kan lawmthu sawi duh dan leh tum dan erawh chu a in ang vek ka ring lo. Lawmthu sawi dan hi kawng hrang hrangin a awm thei a kan nuna lawmna te, lungngaihna te leh harsatna kan tawh dan a zirin a danglam \hin. Vawiinah hian lawmthu sawi dan kawng hrang hrang lo zir ho ila.
1) Engkima lawmthu sawi: “Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a (I Thes 5: 18)”. Mi tamtak chuan hlimna leh lawmna kan tawn chauhin Pathian hnenah lawmthu kan sawi \hina, hrehawmna leh hun khirh tak tak kan tawh hunin lawmthu sawi na chang kan hre leh \hin lo. Pathian hian kan lawm hun chauh nilo in kan hreawm hun pawh in lawmthu sawi turin min duh. |henkhat te phei chuan kan hma kan sial em em a, kan thil duh zawng leh ngaih pawimawh kan dah hmasa a Pathian hi engkimah a hmasa berah kan dah ngai loh avangin kan chungah harsatna leh lungngaihna a lo thleng thin a ni. Hei hi a chhan chu kan duh anga thil a thlen loh khan min ti lungngai thin a ni.
    Tin, mi \henkhat chuan kan thil tih reng reng a tluan purh chuan Pathian remruat a ni ange kan ti mai \hin, harsatna kan tawh deuh chuan a tluang lo Pathian remruat nilo ah kan ngai \hin. Mahse Pathian hian harsatna kan tawh hi a phal a, chu harsatna a\anga amah ring chunga kan beih \ang \ang chuan kan hlawhtling ve thei tho tih hi kei chu ka ring tlat.
    Dr Dale Robins a chuan ti hian a ziak a, “Mi thenkhatten harsatna an tawh nasat vanga an phunnawi fo \hin ka ngaihtuah hian a chhan ni a ka hriat tak chu an phunnawi \hin vangin harsatna an nei \hin. Thil sawisel reng hian engmah a thlak danglam in a ti tha chuang lo. Mahni hreawmna leh sual hnathawh tih puitlinna hmarua mai a ni” a ti.
    Kan zirpui thin pakhat Myanmar khaw kilkhawr tak atanga lokal, an khua kal tur chuan kawngpuiin a pawh phak bakah ni nga (5) lai ke a la kal ngai pakhat chu a pain a boral sana. Kha tih hun lai khan tunlai angin inbiak pawh zung zung theih ala ni si lova. Zualko lehkha chu a hnu thla hnih vel ah a hnen a rawn thleng thei chauh a, chanchin kan han hriat chuan a room ah kan lut khawm a chuta a thusawi ka la hriatreng chu “Piantirh a\ang a tunge an pa hre ngai lo hrim hrim leh pa neilo tam tak an awm laiin kei chu Pathianin kum 30 chhung pa min pe a, vuina pakhat mah ka nei lo” a ti a, chu thu chuan tun thlengin ka thinlungah thu a la sawi. A \ha lam thlir tlat mi, engkima lungawi leh lawmthu sawi zel thei chu khawvel tan a eng a, a eng pawh mite mithmuhah lan tirin a awm zawk \hin.
    2) Engkim chunga lawmthu sawi :     Eph 5:20 ah chuan “Kan Lalpa Isua Krista hmingin, Pathian, Pa ngei hnenah chuan engkim chungah lawmthu hril fo rawh u” tih kan hmu a. kan hlimlai chauhin Pathian hre tur kan ni lova kan hreawm hun ah pawh kan hre tur a ni. Kan nuna thil a kal tluan purh chuan Pathian hi kan lo hrereng thin lova, chuvang chuan Pathianin amah kan hnaih theihna tur in kan chungah harsatna a thlen a phal a, a thlen tir bawk thin. Mihring siam thatnan khawdur a ngai an tih angin Pathian hi harsatna, vanduaina, hreawmna leh lungngaihna hmangin kan hnenah a inpuang chhuak thin.
 Ui pakhat chuan a pu te chaw ei en dauh dauh chungin an nin vawksa an ei laiin dal chawm min ei tir a min ti duhdah bik hle mai a ti a, mahse a han ngaihtuah chiang leh a an vawksa ei ang saw ka ni ve vaih chuan ka chan a chhe lehzual viau anga ti leh hnuhnawh chungin tui ti tak leh lawm takin a ei thei ta a. Hetiang chiah hian kan nun hi midang nen kan khaikhin zel chuan fair lo kan ti zel ang.

Mahse kan inngaihtuah that leh a ngai;hei aia dinhmun chhe zawka awm vai rama in leh lo pawh neilo mi bathlara riak mai mai leh nitina kutdawh ho dinhmun nen kan khaikhin chuan Pathian hnena engkim avanga lawmthu sawi mai loh chu tih tur kan nei lo. Kan dinhmun chhe ta viau a kan ngaih hian keini aia dinhmun chhe ve leh zual te atanga kan teh chuan kan chan a la tha fe zawk.

    3) Engkim hmanga fak :  Sam 150-na ah chuan Pathian chu eng hmanrua pawh, khuang te, tingtang te tawtawrawt chi hrang hrang te a fak a phu zia kan hmu a. Keini hian engkim hmangin kan fak em? Kan hun  tha, kan talent neih hmang te, kan aw hmang te, kan thiamna hmang te, kan ngaihhlut thil hmang te thleng hian kan fak thin em? Heng zingah hian Pathian fakna atana hman phal loh kan la neih chuan phal takin a mah fak nan i hlan ang u. A let a tamin Pathianin a rul dawn che u a, a ti pung dawn bawk tih kan hriatreng a tha. Tin, kan rawngbawlna avanga buai kan in tih lutuk te, kan hna thawhna lama thawkrim kan in tih viau te, mahni tul engmah ti hman lova phet phet phei chuan vui a awl hle thin. Mahse damdawiin leh in lama khum beta natna khirh tak tuar a mu, pathian rawngbawl chak em em mahse an taksa natna avanga thei si lo te hi han en i la Pathian hnena hah leh rim taka a rawngbawl theia hrisel na tha i neih vanga i vanneih zia i hriatchhuah chuan lawmthu i sawi ngei ang. Mi lehkha thiam tak tak hna zawnga vak vak han ngaihtuah leh la rim taka hna thawh tur i neih avangin lawmthu i sawi ngei ang. I sam tla thin avanga I buai thinna zawng zawng kha sam tla tur nei ve lo cancer natna vei chemo lak zawh hnua sam tlakawlh ta vek te i ngaihtuah chuan sam tla tur ila neih avangin lawmthu I sawi ngei ang.

    Kan hrehawm tawrh lai leh kan harsatna tawrh avanga lungawi loh ai chuan a tha lam thlir tlat chunga lawmthu kan sawi \ang tang a tul zawk \hin. Chumi hnuah chuan Pathian ropuina keimahni ah a lo lang chhuak thin a ni.
    “Aw Lalpa, I hnen thlenga nang mamawh lo thei lova min siam avangin Lawmthu ka hrilh che”.

Branch COMMITTEE 498 (8-2011) neih a ni

(Phunchawng branch Tlawh tum a ni)
            Ni 5.7.2011(Thawhlehni) zan khan Kristian |halai Pawl, chanmari West Branch Committee vawi 498na kumin atan a vawi 8na chu Kohhran Committee roomah neih  a ni.
Thurel tlangpui
Thurel 1-na : Lehkha hmuh
        Pu Zosangliana, Chanmari Pastor Bial KTP Secretary hnen atangin Central KTP-in Hmeichhe humsual daite tana Gospel Camping a buatsaih tura hmalakpui tura ngenna kan dawng.  Gospel Camping hi tanpuina pek ngei nise tiin committee chuan a rel a, tanpuina pek tur zat sum erawh chu remchang hmasa berah ngaihtuah nawn leh nise kan ti.
        Biak In thleng pha lote puala chaw nghei tawngtai nei tura  hetiang hian ruahmanna siam a ni.
        A hmun    -    Chanmari West Kohhran Biak in
        A hun    -    Dt. 11th July 2011 Dar 5:30 pm.
        Hruaitu    -    Pu Lalrinawma, Branch Finance Secy.
Thurel 2-na : Variety Show chungchang
        Dt. 22nd July 2011 a Variety Show kan neih dan tur chungchang sawi a ni a, Dt. 14th July 2011 Zan ah Ticket zuar a hnatlan nise , ngaihtuah tur \ul dang awm te chu mawhphurtuten \hahnemngai taka lo bawh zui nise tih a ni.
Thurel 3-na Branch dang tlawh chungchang
        Year Plan a  dah angin August thla remchang ah branch dang tlawh nise tih chu uluk taka ngaihtuah a nih hnuah  Phunchawng Branch KTP tlawh nise tih a ni., OB ten a tul angin hma lo la se tih a  ni.
Thurel 4-na : Solfa Zir chungchang
        Dt. 29th July 2011 Zan Dar 7:00 ah Tv H. Lalthazuala ho in Kohhran Hall No-4 ah Solfa Zir leh nise kan ti. Solfa zir hmasak kha member tam takin an \angkai pui hle tih hriat a ni a , tun \umash pawh hian a tam thei ang berin zir ila tih hi branch committee duh dan a ni.
Thurel 5-na : Review
        i) Branch KTP Sport 2011 : Pathian khawngaihna a zarah Branch KTP Sport hlimawm, hlawhtling leh in-el na thianghlim tak kan hmang zo thei chu lawmawm kan ti a,  theihtawp chhuah a hma la tute zawng zawng chung ah lawmthu kan sawi.
        ii) Blood Donation Camp : Branch Member Thisen hlutak petu te leh pek tum,  harsatna dang avanga pe theilo engemaw zat te chungah branch committee chuan lawmawm a ti a, Pathian min hruaina ah lawmthu kan sawi.
        iii) Bible chhiarchhuah : Dt 6th - 13th June 2011 chhung a Branch pum huap a Bible chhiarchhuah hun kan hmang thei committee chuan  lawmawm a ti a, a hlawhtlin nan a tha leh zung sengtu te zawng zawng chung ah lawmthua a sawi a ni.
Thurel 6-na : Kum chanve hmalak tawhna thlirlet
        Kum chanve chhung a kan hmalak tawhna kawng hrang hrang te kan thlirlet a, hma kan sawnna tur leh insiamthat kan ngaihna lai te  sawiho . Pathian khawngaihna zarah kawng hrang hrang in hma kan sawn zel niin kan hria a, lawmawm kan ti hle ani.
   

Hospital Sunday Thuchah - 2011

Kum 2011 Hospital Sunday kan lo thleng leh ta a, kan Hospital pawh a kum 83-na lai a lo ni ta, hetiang hun min hruai thlengtu Pathian hnenah lawmthu awm se la, he hun hmangtu Kohhran mipui zawng zawngte Hospital-a thawktuten Lal Isua hmingin chibai kan buk a che u.
    Hospital-in kum 2010 - 2011 chhunga kan sum hmuh zawng zawng chu Rs. 16,22,05,806.60 a ni a, hemi a Rs. 1,24,30,000.00 chu Synod Grant a ni a, Rs. 14,73,42,280.00 hi Hospital-in a dehchhuah a ni a, a bak Rs. 24,33,526.00 hi thilpek a ni. Hemi kum chhung veka kan hman ral chu Rs. 16,16,28,991.00 a ni a, a hming chuan Rs. 5,76,815.00 hman bang a la awm a ni. Kum 2001-ah SEC-in Hospital chu thawktu hlawh leh mamawh dangte intum tura a lo ruahman angin tunah hian hlawh leh nitin mamawh chu kan thawkchhuak thei tawh a, Synod Grant kan hmanna chu in sakna, khawl leina leh rethei tanpuina - Charity Fund atan a ni. Charity Fund-ah Rs. 46,16,841.00 zet hmang mah ila 31st March, 2011 account kan khar chuan damlo awmman pe thei lovin min batsak chu Rs. 1,49,61,777.00 a ni.

1.    Damdawi In Chanchin Tlangpui :
     (1)    Khum awm zat -
          Damdawi Inah : 300
          Hospice (AIDS veite enkawlna) : 20
          Avaiin : 320
     (2)    Thawktu nghet :
          (a) Doctor             : 27
          (b) Nursing Staff   : 105
          (c) Thawktu dang : 107
           A vaiin : 239
     (3)    Thawktu nghet lo
         (a) Doctor          : 3
          (b) Nursing Staff   : 64
          (c) Thawktu dang : 41
          (d) Convenant Year : 31
        A vaiin : 139
          Thawktu zawng zawng : 378

2.    Thawktu nghet lak tharte :
     Asst. Librarian - 1, Staff Nurse - 1, Medical Officer - 3 leh Grade IV - 1, an vaiin mi 6 a ngheta thawk tur lak an ni.

3.    Retreat :
     Thawktu pual retreat neih a ni a, Speaker atan Rev. F. Lalrinnunga, Director, SMTC chu hman a ni. Thupui ‘Rinawmna’ tih a ni a; tin, Covenant Year leh Nurse zir thar turte pualin Retreat neih a ni bawk a, Speaker atan Rev. C. Lalbiakhluna leh Rev. R.S. Rokima, Chaplain-te hman an ni.

4.    Mobile Clinic :
     Nikum Hospital Sunday leh tun inkar chhungin Pastor Bial, Kohhran leh khaw hrang hrang 74-ah Mobile Clinic neih a ni a, damlo 7687 en an ni. Project hrang hrangah hma kan lak avangin thawktu kan indaih lo em em a, chuvangin min sawmtu Bial leh Kohhran zawng zawng kan tlawh thei lova, pawi kan ti hle.