Khawvel hi sualin a awih mut lai takin Lal Isua a lo kal ang (Luka 19:41 ; Matthaia 25:3, 24:44) - R.K. Daniela

       Bible chang hmun thuma mi kan tarlante hi Lal Isua tawngkam, thleng tawh leh lo thleng turte an ni.

       Eden bawhchhiatna sual mihring pianken hi Pathianin a ngaidam ngawt thei lo. He kan pianpui suala pai tawh kan nihna hi phurin Lal Isua chuan kross-ah a tuar a, khenbehin a lo awm ta. He khenbeh, Pathian pawhin a kalsanna hmun ngeiah hian “Thilsiam Thar (Mi thar)”, thlarauva piang, Kross thisen hrin chu a lo lang chhuak ve ta a. He mihring thar hi chunglam chhuak a nih avangin lei lam thil nen an inmil thei ta lo. Duhdan, ngaihdan, engkim a danglam ta vek mai a. He mihring hlui nun hmasa zawk chu nitina khenbeh niin mi thar chi nitina siam thar zelin Krista annaah a thanglian zel tur a ni. He mihring thar hian taksa a luahin a khalh kal ta a, pawnlam lo hmu chiangtu te chuan mak tiin a testimony hi an sawisak zawk thin a ni.

       Kan thupuiah lo lut tan dawn tawh ila. Lal Isua khan Palestina ram dung leh vang a fang a, Jerusalem khawpui pawh a fang thin. Mahse Lal Isua, Pathian Fapa, khawvel Chhandamtu chuan Jerusalem a fang tih reng reng an hre lo. Isua fan lai hre lo Jerusalem chu tihchhiat vek a ni dawn tih Lal Isua chuan a hria a, thlamuanna thu sawiin awmzia a nei tawh si lo. Thlarau Thianghlim fan lai hre lo emaw hre duh lo lui ngat tunlai Kristian inti te zingah pawh hian a awm theih hle ang. Chung mite chuan an la tuar ngei dawn.

       Lal Isua ni lo khawvel mawina, hausakna, thiamna leh finna, ei leh bar, silh leh fen tinreng, Lal Isua tel lova min awm tleitu a va tam em! Chatuan tling zo lo, he damchhung rei lote daih tur chauh thlahleltu an pung tual tual, an tan hun a awm lo thuai ang.

       Bible ah hian ‘Isua Krista Ni’ tih leh ‘Lalpa Ni’ tih kan hmu a. Isua Krista ni chu rukru anga, A mithianghlimte lam tura a lo kal ni tur a ni a. Lalpa ni erawh chu ropui rapthlak taka rorel tura a lo kal lehna tur sawina a ni.

       Lal Isua fan lai hre lo Jerusalem khawpui khan a chhiatphah vek ang khan vawiina Lalpa fan lai hre duh lo te chuan an la tuar dawn a ni. He khawngaihna hun tawp hunah chuan khua a tlai tawh ang. Hun tawp chu a hnai tawh si a.

       Matthaia 25:3-a kan hmuh angin nula thianghlim sawm mo hmuak tura kalte kha zan laiah authawm an hriat khan nula thianghlim panga te khan an khawnvartui an lo keng lova, an han tho ve chiah a, mo neitu a lo thleng chawpchilh ta mai si nen an buai em em mai a, tumah rengin an mamawh an pe thei lo. Tlai khawhnuah khawnvartui an va lei ve a, mo neitu inah an kal, mahse kawngka khar hnan an lo ni ta. “Ka hr ngai lo a che u” tih chu an hlawh tawk a ni ta. A pawi teh zawng a nih hi.

       Ringtu, thlarau hruaia awm, mahni lam tawp der tawh, thlarau duhzawnga hruaite chu lo muhil pawh ni se Lal Isuaah an chawl hahdam tawh a, inring rengin an lo awm tawh zawk a lo ni. Lal Isuaa chawl tawh te chu thlamuang takin an awm a. Mihring lama inrin vak a, hah taka hlauthawng taka awm a tul tawh lo. Mihring lama lo inrinna hian awmzia a nei lova, chutianga lo inring hah taka te nun chu kross-ah tihtawp a ni tawh zawk a. Ringtute awmna Lal Isua-a chawlh hahdam mai kha a thlamuanthlak takmeuh a, Krista Ni a lo hnaih zel hian hlimna leh lawmna thuruk chu a pung tual tual zawk a ni.

       Lal Isua fan lai hre duh lo Jerusalem tihchhiat a ni ang khan he khawvel hi sualnain a awih mut hun lai takin Krista ni chu a lo thleng dawn a ni.

       Tunah hian eng dinhmunah chiah nge i din? Khawiah nge i awm? Thlarau hruaia awm apiangte chu Pathian fate an ni.

       Lal Isua ring thei lo, ring thiam lo, thlarau hruaia awm thiam lo, inring renga awm thiam lo - nun hahthlak, nun thlaphang hi Lal Isua chuan thiah fai veka, tihtawp a duh a, chu nun Kross-a tihtawpna takah chuan nun thar pek che a, hruai che hi Lalpan a duh ber chu a ni.

       Thlarau hruaia awm tur chuan thlarauvah vek pian a ngai a ni e.

            Lal Isua ni lo thil dang awm tleitu che, nun derthawng tak kha thlahlel lova, Lal Isua nun i duh zawk a, i thlan rualin thihna ata chhahchhuah i ni ang a, nunnaah i lut ngei ang. Chu chu mihring hlui thihna leh mihring thar (Siam thar)-a pianna chu a ni e. Lalpan malsawm rawh se.

KA DUH EM ASIN - Rev. C. Chanchinmawia (Roreltute 14: 1-3, Ephesi 6:4)

Kan tunlai khawvel hi kan hmu a, thil langsar deuh mai chu tumah min thununtu an awm lo hi chu thu hran ni se, mahni inthunun tum pawh kan vang ta reng reng mai hi a ni. Nula tlangval kan ni emaw, nu leh pa kan ni emaw, naupang kan ni emaw, mahni inthunun mai tum hi kan awm ta mang lo a. Duh duha nun chaknaah hian an tuihal a. Tunlai tawngkam lar tak - It's my life an tih hi a tak takin ka hre ve ta nual mai. 'Keima nun a nia, ka thu thu a ni' ti ngut ngut mai, 'Dan a lal tur a ni' tih \an chhan hian, 'Right ka nei, ka dikna chu ka dikna a ni mai, tumah an inrawlh thei lo' ti ngut ngut mai hi an va tam ta em. Kohhran pawh hian harhna kan beisei hi kan duh tawk, kan lo control theih tawk harhna hi kan zawng vek mai a. Harh lutuk pawh kan tlin lo, harh loh lutuka hel lutuk pawh kan duh lo.
    Harhna nuam tawk vel hi kan zawng vek mai a. Kan nun kal meka thil langsar ber mai chu kan duh zawng a lal ber mai hi a ni. Inawkhlum kan tam ta lutuk te hi eng nge a chhan? A chhan ni bera lang chu kan nun hian 'Ka duh em asin maw le' tih a ngah lutuk a, chuvang chuan nun zel peih lo-in mi an inawkhlum a ni ber mai. A duh ang a hmu lo a, thih a thlang tih mai hi a tawi zawnga chhanna a ni. Thalai rualte pawh hian rawngbawlna kan tih zawng zawng pawh hi kan duhzawngin kan keuh thlu vek a, Lal Isua duhzawng kan ngaihtuah thei tawh lo. Kan duhzawng rawngbawlna kan thlang tlat mai. Work Camp kan ti emaw, kohhran hnatlang pawh ni se haw haw boruak deuh lo chuan kan tlin tawh lo reng reng. Tunge kal thei ang? tiin han inzawt ila, 'A nuam ang em le?' tih a ni deuh vek ta mai.
    Roreltute lehkhabu-a kan hmuh angin Samsona chu Lalpa mi, Lalpa hriak thih, Lalpan roreltu atana a thlan kha a ni. Philistia, hmelma kumhlun tudawltu a ni a, a hnathawh chu ropui tak a ni. Nimahsela a nungchang leh awm dan chu bawrhbang tak a ni. A naupan tet a\anga sam pawh met ngai lo, Nazarit mi an tih mi thianghlima khan Timna khaw nula chu nupuiah a duh ta em em mai a, a pa hnenah 'Min neihtir mai rawh, ka duh em asin maw le' a'n ti thlawt mai a nih kha. Pa-in a hnial thei tawh lo a, Pathian mi, roreltu Samsona tawpna chu mualphona a lo ni ta. 'Ka duh em asin maw le' tih hian Samsona nun chu a vaw keh ta vek a ni. Lalpan hriak a thih chhan a ngaihtuah lo a, roreltu-a a ruat chhan a ngaihtuah hek lo. Lalpan a kohna leh a dah chhan ngaihtuah lo-in a duhzawng laltir turin a inbuatsaih a, chu thil avang chuan mualpho takin roreltu, Lalpa mi chu a lo awm ta a ni.
    Kan hnam, kan ram, Kohhranho hi engin nge min timualpho thin? Engin nge kan hmelte hi tichhe \hin? Min tichhetu hi eng nge? |henkhat chuan ruihhlo tam lutukte, corruption nasa lutukte, roreltu fel lo te - heng zawng zawng hi kan ram timualphotu an ti ang. Dawt a ni lo, a dik vek a ni. Nimahsela min timualphotu dik tak hi chu 'Ka duh em asin maw le' tih hi.Mi thenkhatin hnam dangin min chim ralte an hlau em em mai. Hlau reng reng suh u. Mahni duh zawnga inchim ral mai mai tur hi kan tam ber zawk. Hawh u, kan duhzawng hi i thlak tawh ang u. Lalpa duhzawng eng nge ni tih hriat tumin, kan Pathian hmaah hian he ram leh hnam hi i \hing\hi tawh ang u. Eiru kan tih zawng zawng pawh hian eiru duh lo se khawiah nge an eiruk tehlul ang ni. An duhna hian a tichhe mek a nih hi. Duh kan thlang hnem ta a, kan duhzawng hian min tichhia a ni tih hi pawm ila, LALPA duhzawng eng nge tiin hun i hmang tawh zawk ang u. (from- www.synod.org)

KRISTA THUHRETU R.K.Daniela

“Chung thil zawng zawng chu a hretu in ni e” -Luka 24:48

    Lal Isua thawhleh hnuah zirtirte hnenah a inlar a, Pathian lehkha thu hriatnan an  thinlung a tifing a. Krista chuan hrehawm a tawtrh tur leh, ni thum niin mitthi zing ata a tho leh ang tih Mosia danah te, Fakna hlabu ah te, a chanchin a ziak apiang a lo thlen tur zia a hrilhfiah a. He a thihna leh thawhlehna chanchin\ha avang hian ama hmingin simna thu leh sual ngaihhna thiamna thu Jerusalem khua atanga \anin, hnamtin hnenah an hril ang tih a hrilh lawk bawk  a. Krista thihna leh thawhlehna hretu an nih zia a hrilh a ni.
    Krista thihna leh thawhlehna thu hi chanchintha laimu chu a ni a, tirhkoh Paula pawhin, “Hei lo chu hriat kan tum lo tih leh he chanchin\ha ni lo chanchintha dang hril tu chu anchhe dawngin awm rawh se a lo ti a ni. He chanchin\ha hre tawh tute mawhphurhna chu mi dang hre lo te hnena hrilh darh zel hi a lo ni ta a ni. He mawhphurhna pawimawh em em hi Krista thu hretute( Ringtu) chuan mut mawh-hnar mawh a neih tur a ni, a aia hlu dang reng reng a awm lo. Lei Eden leh Van Jerusalem hawlh tlang a ni a, a ropui em em a ni.
    THU HRETU DINHMUN:
    1.    Rinawmna leh Dikna: Thu hretu dinhmun hi a pawimawh hle mai, thu hretu tel lo chuan tumah thiam chang emaw thiam chang lo a awm theih loh. Court rorelna pawh thu hretu tel lo chuan a kal thei lo. Court-ah chuan’ THU DIK A LAL BER’ tih a ni a. Thu hretu rinawm leh rinawmloh hian court rorelna chu a tidik in a tidik lo thei fo. thu hretu rinawm avangin court chuan mi dik a zalen tir a, mi diklo a tan tir \hin. Chuvangin thuhretu chu a rinawm hle tur an nia, a thu hriatah a chiang hle tur a ni.
    2.    Huaisenna: Thuhretu chu a thu hriatah a chian em avangin a huaisen \hin. Dawt a sawi thei lo, chanchintha laimu nei tawh tute chuan huaisen takin an thu hriat an hrilh \hin.
    Petera leh Johana huai zia chu an hmuhin lehkhathiamlo mi mawl tak an ni tih an hriatin mak an ti hle a, Isua hnenah an awm tawh tih an hria a(Tirh. 4:13)
    “Keini zawng thil kan hmuh leh kan hriat te kha sawi loin kan awm thei lo” an ti a.(Tirh. 4:20)
    3.    Krista thu hretu chu amaha awm Thlarau thianghlim engkim ti theitu chen chilh an nih avangin huaisen takin tawrhna leh harsatna hnuaiah pawh chanchin\ha a hrila, chanchin\ha avanga tuarna, thihna thlengin a chanvo a ni tih a hria a, tuar tlaka ruat a nih avangin a lawm em em thin a ni. Lawmna tak mai thinlunga Lal Isua pek chu van lawmna chatuan daih a nih avangin nitin a KROSS puin Lal Isua a zui thin. Engmah hian a ti danglam thei tawh lo ’HE NUN thuruk hi a nei tawh tan chuan hnunglam a hawi a theih tawh loh a, khenbeh nun a nih avangin khaw dang hawi thei a ni tawh lo.
    He nun pawimawh tak, he khawvel nun tawp hnu pawha bul \an ang chauh la ni zel tur hian i nunah thiltitheiin a fan tawh che em?
    KRISTA THU HRETU i nihna hi i phatsan tawh mai em ni? Khawvelah hian engmah kan luh pui lova engmah kan chhuah pui dawn hek lo. He nun thuruk chauh hi khawvela i neih tur chatuan thlenga sang deuh deuh tur hi nunpuia vuan nghal turin ka ngen ngawih ngawih a che.
Lalpan a thu mal sawm rawh se.

Upa Thanmawia Kan chan ta

    Chanmari West Presbyterian kohhran upa min, Upa Thanmawia chu Ni 2.8.2011(Thawhlehni) khan ropui taka vui liam a ni. Zing dar 11 ah anmahni inah Rev. K. Lalhmingliana, Bialtu Pastor chuan vuiin thlamuanna thuchah a sawi a. Upa R. Thangkima’n chhungkaw aiawhin thu a sawi zawhah Bialtu Upa, Upa Lalkunga chu tawng\aiin KHB no. 454 “Ka hmaah luiral khawmawi chu a awm” tih chu sak a ni a. Malsawm tawngtainain in lama vuina hun chu khar a ni.
    Biak In lamah chuan vuina programme hi dar 1-ah \an a ni a, Upa Lalzawmliana, Kohhran Ziaktu chuan a chanchin tlangpui a sawi a. Rev. R. Lalnuntluanga, Moderator, Aizawl Bethel Presbytery chuan thlamuanna thuchah a sawi. He hunah hian Chanmari West Kohhran Zaipawl te chuan thiam tak maiin “Ram eng mawi tak chu a awm” tih hla chu an sa a. Kohhran Comittee Chairman Upa C. Thansiama chuan tawngtaina hmangin KHB No. 461 “Khita Vanhmun nuamah khian tlante an zai” tih hla chu sak a ni a, malsawm \awng\ainain hun tihtawp a ni ta a ni.  Pro-Pastor R. Lalfakawma chuan thlanmual lamah vuina hun a hmang bawk.
A CHANCHIN TLANGPUI
    Upa Thanmawia hi Pu Chalkunga leh Pi Thangthluaii te inkarah Ni 17.12.1923 khan Lumtui khuaah a lo piang a. An unau hi rual ve tak niin unau mipa 8 leh hmeichhia 2 an ni. A pianna khua Lumtui a\angin  kum 1932 ah Lailak khuaah an pem a, kum 1942 ah Hriangtlang khuaah an pem leh a. Ku 1943-ah Pathianin a pek Sesawng nula, Sawihari nen intawngin Rev. Selkhuma kutah an inkutsuih a. Nupa kawprem tak niin kum 1949-ah Hriangtlang khua a\angin  Darlawn khuaah an pem leh a, fanau malsawmna an dawng hle a, fa hi 13 neiin tu hi 60 a nei tawh a ni. A nupui Pi Sawihari hian October ni 1, 1990 khan chatuan ram a lo pansan tawh a ni. Amah hi pa zaidam leh nunnem tak, mi pawisawi hlau tak a ni.
    Darlawna a an awm lai hian khawtlangah theihtawp a inhmangin eng party pawh lal se V.C Secretary atan an hmang \hin a, kum 15 vel zet chu V.C Secy hna a chelh nghe nghe. Amah hi kut hnathawka mahni intodelh tum mi a ni a, thlawhhma neia ei zawng \hinin Aizawl an lo pem hnu hian Furniture Workshop siamin eizawnnan a hmang ta  a ni.
    Kum 1956-ah a piangthar a, a hlim em em \hin a, heta \ang hi chuan a hun tam zawk hi chu Pathian thu sawinan a hmang a ni ber mai. Kohhran tan a theih ang tawk tawk in a inhmang ve zel a, kum 1972-ah Kepran Presbytery khawmpuiah Darlawn Chhimveng Kohhran Upa atan nemngheh a ni. Eizawnna lam avangin 1980 ah Aizawl Chanmari-ah an pem lut a, heta \ang hian tuna a chennaah kum 1984 khan a insuan thla leh a, kum 1985-ah Chanmari kohhran a\angin Chanmari West a lo piang a, kum 1986 ah Chanmari West Kohhran Upaah thlan nawn a ni.
     Upa Thanmawia hi pa hrisel leh chak tak a ni \hin a, inbuan leh lungdenah te pawh duai lo ve tak a ni. A kumte  lo tam ve zelin tar chaklohna in a bawm tih loh chu natna hran em em nei loin a awm a. Nikum ni 10 October 2010 khan an kawt step ah tlusualin a malpui ruh a ti tliak a, New Life Hospital-ah admit niin engemaw chen  enkawl a nih hnuah in lamah enkawl chhunzawm reng a ni a, mahse \hat chhuah tak tak awm tawh lo in tar chaklohna chi hrang hrang in a tlakbuak ve reng bawk a. Ni 2 July 2011 a\ang khan chaklo zualin a hniam thla zel a ni. Ni 1 August 2011 tlai dar 3:50 ah Lalpa hnenah chawlhlen turin min kalsan ta  a ni.