Ram Changkang-te Thuruk
- by Victor Zika
Ram rethei leh ram hausa-te inthlauhna hi an ram upat leh naupan chungah a innghat lo hle a ni. Entirnan:- India leh Egypt ram te hian kum sang chuang lo hmang tawh mahse, tun thleng in ram hausa an la ni chuang lo. Australia, Canada leh New Zealand te hi kum 150 chuang chauh ni mahse, an ram hi khawvela ram hausa zinga puan tel an ni ve thung.
Chuan, ram rethei leh ram hausa-te inthlauhna hi, a ram leilung hausakna leh thil chhuak chungah a innghat bawk hek lo. Japan ram hi tuifinriat in a hual a, an ram 80% chu tlang ram chhe tak tak te a ni. Thlai chin nan leh ran vulh nan a ram leilung dinhmun in a pe bawk hek lo. A ram leilung in hausakna leh thil hlu a rawn chhuahpui bawk hek lo. Mahse, khawvel a ram hausaber zingah a tel pha ve tlat a ni. Kan thenawm Burma ram chu, ram leilung hausakna leh a ram hian thil hlu (lunghlu, rangkachak, khawnvartui, Gas etc.) tamtak chhuahpui mahse, khawvela ram retheiber nihna an chang ta tho mai le.
Retheihna leh Hausakna inkar hi engin nge dang ta le? A chhanna chu, "Mihringte Rilru" tih hi a ni. Ram hausa, changkang leh hmasawn te awmdan han en i la, a hnuai kan ziahte hi kan hmu thei ngei ang.
1. A tlangpui thu a kan hmuh theih tur chu, 'an nungchang a mawi in an fel hle a ni'
2. An lung a rual hle bawk.
3. An mawhphurhna an hria a, an mawhphurhna ah an rinawm bawk. (in hriatthiam tawnna a awm ve lo)
4. An ram dan leh dun an ngai pawimawh.
5. Ram mite chanvo, nihna hi an ngaihlu thiam hle bawk
6. An hna an hmangaih, an hnaah an phur, an rilru an seng
7. Pawisa khawl leh peipun dan kawng an ngaihtuah thiam.
8. Khawihmunah pawh thil an tih reng reng in, a tha thei ang ber ni turin duhna tak tak an nei.
9. Hun hlutna an hria, Hun an ngai hlu thiam.
