CHANMARI WEST BRANCH KTP CHANCHINBU

LALPA PAWL NAN - Rev. Dr. Zaihmingthanga.
“Khawngaih takin I hmel chu min hmuhtir ta che” (Exodus 33:18)
Tunlai chu Internet hmang hian khawvel khawi laia mi pawh hi hmel inhmu miah si lo hian kan indawr kual nasa thei hle mai a. A hmanraw nei tha deuh tan phei chuan computer hmaah kan biaka te hmel pawh a lo lang nghal thei tawh a. Mobile phone hmang te hian awlsam takin SMS in a indawr theih reng bawk a, kan \halaite ho tan phei chuan atchilh mai pawh awl tak tur a ni e.
A chunga kan tarlan khi Mosia leh Pathian inbiakna thu a ni a. Mosia chu Pathianin a mi Israel fate hruaitu atan a ruat a. Thiltihtheihna nasa takin a thuam a, Aigupta rama sala an tang chu Lalpa kut chak tak chuan a hruai chhuak ta a. Thlalera an vahvaihnaah pawh harsatna namen lo tak an tawh chang a awm \hin a. Mipuite aiawhin  Mosia chuan Lalpa chu a be \hin a. A mite hnena awm chu tiam mah se Mosia chuan Pathian awmpuina chu a taka chan a duh \hin. Lalpa hmel ngei te chu hmuh a chak \hin a ni. 
Pathian chuan  ti hian a chhhang a:  “I hnenah ka \hatzia ka tilang ang a, ka hming pawh         i hriatah ka sawi ang, LALPA ka nih hi. Ka duh apiang  chungah ngil ka nei ang a, ka duh apiang chu  ka khawngaih mai ang. Ka hmel erawh chu I hmu thei lo vang; min hmu chu tumah an nung thei lo a ni,” a ti a (Exodus 33:19-20). Pathian Ropuina hmaa ding thei tur hi tumah kan awm loh turzia hei hian a tichiang hle awm e. 
Thlaler thingbuk alh a\anga kotu kha AWMA a ni a, chu AWMA chuan a awmpui reng a, chu chu LALPA, Engkim siamtu leh Engkim chunga thuneitu chu a ni tih Exodus 3-ah hian kan chhiar bawk a. Mosia chu zam hle \hin mah sela  AWMA chuan a  awmpui reng a, a \ul apiang ti thei turin LALPA chuan a hmang \hin a ni. Mosia hnena Pathian inhriattirna hi thil pawimawh tak mai a ni a. “Ka duh apiang chungah ngil ka nei ang a, ka duh apiang chu ka khawngaih mai ang,” tih \awngkam hian Pathian chungnunzia leh zalenzia, a thu thu, a tihdan ang ang chu \ha leh dik, tuma sawisel phak loh a nih zia a tilang chiang hle mai. Chutah tak chuan Mosia, mihring ve bawk, tling lo leh tlak lo, insit ngawih ngawih pawh chu Lalpa chuan a mi Israelte chhanchhuaktu atan a thlang miau va, a hna ropui tak thawk tur chuan a khawngaihna leh lainatna chuan a hliahkhuh tawp  mai a ni.
Tirhkoh Paula pawh khan helai thu hi a rawn la chhuak a, Rom 9:15-19-ah khan Pathian thiltih dan chu tu duhdan mah ni lovin, Ama duhdan taka a tih a nih thu a tarlang a, “Chutichuan Pathian chuan  a duh apiang a khawngaih \hin a, a duh apiang pawh a tiluhlul thin a ni”, a ti a. Pharoa thinlung tihkhauhva a awmna chhan chu eng dang vang mah ni lovin Pathianin a thiltihtheihzia a lantir theihna tura tih a nih thu kan hmu a. Israel fate a chhanchhuahna chu Pathianin a khawngaih vang  a ni a, an fel vang leh an phu vang lam a ni lo. Pathian lakah sualin milem biaksan \hin mahsela Pathian chuan a la hmangaih reng a, an chungah a ngilneihna chu a lantir mai a ni zawk e.
Keini pawh a rawngbawl turin Lalpan min ko va, kan tling lo chung chungin tlingah min pawm a, a hna thawk turin min \anpui a, kan ti ve zel mai zawng a nih hi le! A fel fel leh a \ha \ha te thlan awm an nih lai hian  Pathian hian engati teh lul nge kei ve hi min thlan ve ringawt ? tihte hi i ngaihtuah ngai em? A chhanna chu hei hi a ni -  “Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” a tih tawngkam hian nang leh kei pawh min huam tel reng a lo ni e. 
Lalpa hmel hmuh chakin Mosia chuan Pathian awmpuina chu duh tawk lovin a hmel ngei hmuh a dil a, nimahsela Lalpa chuan, “Ka hnung lam chu i hmu ang a, ka hmel erawh chu I hmu lo vang,” tiin a chhang a. Lungpui keh kak karah chuan Mosia chu a thukru a, a kutin a hup a, Lalpa Ropuina chuan a kalpel ta a. A hnunglam erawh chu a hmuh phalsak a ni. Ni, hmaichhanah keini tehlul hian Pathian Ropui chu kan hmu ngam lo vang. Amaherawhchu kan thil hmuh leh tawn chhoh zelah hian Pathian ropuina leh a hnathawh chu kan hre thiam ve leh chauh \hin zawk a. Hla siamtu in “He hideth my soul in the cleft of the Rock”, a lo tih angin Lalpa chuan kan nunna derthawng tak mai chu Lungpui phenah chuan min lo hum \hin a lo ni a. “Ka Lalpa hmu lo mah ila, ka hnenah a awm reng fo va”, tih hla siamtun a lo tih ang khan, hmu lova ringtute eng chu a thawl thin a, Amah ringtute chu Lalpa hian a lo hliahkhuh hneh em em mai a, Chakna leh Thil-tihtheihnain a lo thuam \hin a lo ni e. Kan rawngbawlna hi Pathian Khawngaihna avang vek a lo ni e.