CHANMARI WEST BRANCH KTP CHANCHINBU

AW KRAWS !-- Rev.Lalramliana Pachuau Administrative Secy, PCI
 (Galatia 6:14; 1 Kor. 1:18-23)
Krista, Pathian Fapa chu khawvelah hian nung tur ni lo, thi turin a lo kal a. A nunin a tinzawn, a goal chu kraws-a thihna a ni. Keini tan erawh chuan chu thihna chu nun kan neihna tura thihna a ni. Good Friday hi kan nunah awm lo se, Easter Sunday pawh a awm lo vang.
Inhlanna, inpekna, tuarna leh thawhrimna rah te hi hlimna a ni nge nge thin. Kristianna hi ni eng mawi nen a in\an lo va, tlawmna nen a in\an. Lal Isua chu kraws pumpelh turin thlemin a awm \hin. Diabolan khawvel hnehna tur pumpelh kawng pathum a tiam a. Petera chuan Lal Isua chu kraws-a a thih tur thu sawi tawh hauh lo turin, kraws kawng zawh lo turin a thlem a. Mahse, ‘Setan, ka hnungah kal rawh…’ tia zilhhau a tawh phah a. Golgotha hmunah khan a hmelmaten an cho va, ‘Kraws ata kha lo chhuk la kan ring ang che,’ an ti. Lal Isua khan ama zirtirna – ‘a nun  rawngbawlna atangin la bo ila, hnutchhiah a awm mang lo vang. Kristianna ngei pawh hi a awm lo vang. Kraws chu kan sual vanga awm a ni. Kan sual thawina tura hlan tur dang a awm lo, Lal Isua, Pathian Fapa, sualna nei lo leh hmelhem lo chauh lo chu. Kan sualte phurin misual hremna chu kraws-ah a tuar a. Inthawina nung (reng), thianghlim leh Pathian lawm tlak chu a hlan a ni. Kraws chunga Lal Isua nen nihna leh chanvo kan in thlengte hi han thlir mah teh:
-Ngaihdam kan nih theih nan hremin a awm a;
-Tihdam kan nih theih nan vuak a tuar a;
-Pathian hmaa mi fela puan kan nih theih nan ani chu misuala chhiar a ni a;
-A nunna tawmpuia kan lo nun theih nan kan thih ai a thi a;
-Malsawmna kan chan theih nan anchhia chu a phur a;
-A hausakna kan tawmpui theih nan kan retheihna zawng zawng a phur a;
-A ropuina kan chan ve theih nan kan mualphona chu a kovah a nghat a;
-Faa pawm kan nih theih nan hnawlin a awm a;
-Mihring thar chu keimahnia a nun theih nan kan mihring hlui chu a thihpui a
- ‘Amahah chuan kan tlanna kan nei a ni, a khawngaihna ngahzia ang  zela  kan sualte ngaihdamna chu.’ 
Lal Isuan nang leh keia ai awha a tuarna zawng zawng hi ngaihtuah la, chumi avanga thil \ha kan chan zawng zawng hi ngaihtuah bawk teh. Engti kawng mahin kan phu reng vang kan tih theihna lai tur a awm lo. Khawngaihna avang liau liau a ni asin.
Unau duh tak, Lal Isuan kraws-a min tuarsakna avang chauh hian Pathian chu kan tawk ngam dawn. A khawngaihna avanga min tlanna avang chauh hian kan sualte ngaihdama awmin Pathian hmaah thiam changing kan ding thei dawn. I pathian tawk turin i inpeih em ?
‘Thiam chan loh ka hlau tawh lo vang, ka Pa lung a awi ta,’ i ti thei tawh em ? ‘Aw kraws, kei misual thiam channa.’ ‘Kraws chu, aw kraws rit tak mai chu, Isuan ka tan a pu’ a.
Chumi avang chuan ka hming hnaisai lo Pa hmaah Isuan a \an ang a, ‘ka mittui a tla tawh lo vang, hmangaih reh lohnaah.’ ‘Ka thil tihsualte avangin, kraws chungah a rum a; khawngaihna leh hmangaihnain min pe chatuan nunna.’ Chuvangin ka Pathian tawk turin ka inpeih ta, thiam loh chan ka hlau tawh dawn si lo va. Ka inpeih mai a ni lo. Ka Lalpa hmel hmuh hlan ka nghakhlel asin. A kut a ke a naka keimah vanga hliam a tuarna zawng zawng te kha, a lallukhum nen ka han hmu dawn si a. ‘Lo kal thuai rawh, kan lawm hle ang lo kal la.’ “Maranatha” ! Chuvangchuan kei leh nang hian kan Lalpa Isua Krista kraws hi i chawisang zel ang u.