CHANMARI WEST BRANCH KTP CHANCHINBU

Vanram      -Tetea

A kal tawh/hmu tawh ten nuam an tih leh kal leh thuai thuai an chak em em, a la hmu lo ten a awm dan suangtuah har kan tih hle si, duh duh tana kal theih mahse kal theih dan chu kawng khat chauh ni si, Kristian zawng zawng ten kal kan tum vekna hmun Vanram hian engtinnge kan nunah pawimawhna a neih kan chhut ngai em? Thih hnu chauha kalna tur a nih avangin \halai tam zawk hi chuan kum upa zawk te chauhvin an ngaihtuah tur leh khawvel chhuahsan dawn hnaiha inthlamuanna tur, mi lungleng thei deuhte leh hlaphuah thiamten an inhnemna tur satliah ni maia ngai kan tam hle niin a hriat. Chuvangin he thih hnu piah lam ram, vanram hi heti zawng hian i han chai ho dawn teh ang.
Khawia awm nge? : Vanram awmna hi kan Bible in min hrilh dan chuan Vanah tih zawng hi a ni mai a. Hmun bik nei, chunglama awm ni tura ngaihdan hi kan pawmtlan vek dan chu a ni awm e. Hei hi Judate ngaihdan leh pawm dan pawh a ni bawk a, Thuthlung thar thlir dan pawh a ni. Zirtu \henkhatte erawh chuan Isaia 14 tlawhchhanin hmar arsi piah lama awm niin an ngai. Vanram chu khawvel piahlama Pathian  chenna hmun, nakina ringtute kalna tur hmun a ni tih kan hriat rualin Pathian thu vekin he khawvela kan chan leh tem lawk theih a ni tih min hrilh bawk (Phil.3:20) tih hi hriat tel a \ha awm e. 
Eng tiat nge ni? :  Vanram len zawng chu a hmutawh intite sawidan hi kan hriat chu a ni mai a, a zau zawng leh awmdan an sawi lah hi inanga sawi an vang hle lehnghal a, an sawi inang tlangpui thin erawhchu, Vanram chu a zau lutuk a, an thawl hle a ni tih hi a ni awm e, A zau zawng sawina chiang tak a kan hmuh chu Thupuan bu a mi hi a ni mai a (Thup.21: 16). Heta a in ziahdan hi chuan a dung, a vang leh a san zawng fing 12000 (Km 2,400 bial tihna) a ni. London khawpui chu Km.25 bial vel a ni a, mihring maktaduai 8 leh tlem an awm an ti. Chuvangin, Vanram a mihring len tam tur zia chu chhut thiam phak bak hial a ni awm e.
Vanramah chuan eng nge awm lo? Vanramah chuan mittui zawng zawng a hul vek tawh ang a. Thihna a awm leh tawh lovang a,lungngaihte, tahnate, natnate pawh a awm tawh lo va (Thup.21:4). Biakin reng reng a awm lova, Lalpa Pathian Engkimtitheia leh Beram No chu an Biakin a ni. Khua chuan a en turin ni leh thla eng a ngai tawh lo va; Pathian ropuina chuan a en a, an khawnvar pawh Beramno a ni (21:23). Zan khawthim a awm tawh lovang a; thil bawlhhlawh reng reng a awm tawh lovang. Thil tenawm titute, dawt hmangte pawh an awm lovang a (21:25-27) Anchhia reng reng a awm tawh lo ang(22:3). 
Heng hlawmthum kan han tarlan atang hian kan sawitum chu a lang uar tawhin a rinawm, Ringtute (a bikin \halaite) rilruah Vanram ngaihtuahna hian hmun thuk zawkin chang thei sela chuan Pathian tan nun serhhran leh nunnghehna hi kan nei ngei ang. Vanram ngaitu ringtu nunah chuan van nawmna temlawkin Pathian chenchilh nun hi an nei thin. He ram hrechiangtu hi chuan a zuah em avang leh mihring kan len hnem em avangin ringlo mite pawh thahnem ngai takin lut ve turin an sawm thin a, a nawmzia an hriatchianna avangin he leiah hian duhamna leh pamhamna an nei ve tawh ngai lo a Van hmun chan loh hlauhna avangin khawvel thil te hian an inti chhe ve tawh ngai lo. Chuvangin, Vanram kan kal \heuhna turin Vanram ngaihtuahna hian kan nun hi luahkhah tir ang u.